ជាង២ឆ្នាំ កម្ពុជាបានបណ្ដេញជនបរទេស ដែលពាក់ព័ន្ធនឹងបទល្មើសអនឡាញជាង១ម៉ឺននាក់
ចេញផ្សាយនៅថ្ងៃទី៨ ខែតុលា ឆ្នាំ២០២៥
កម្ពុជាបានបណ្ដេញចេញ នូវជនបរទេស ដែលពាក់ព័ន្ធនឹងបទល្មើសអនឡាញជាង ១៥ ០០០នាក់ នៅក្នុងរយៈពេលជាង២ឆ្នាំ ក្នុងនីតិកាលទី៧ នៃរដ្ឋសភា។ នេះបើយោងតាម លោកឧបនាយករដ្ឋមន្ដ្រី ស សុខា រដ្ឋមន្ដ្រីក្រសួងមហាផ្ទៃ។
លោកឧបនាយករដ្ឋមន្ដ្រីបានថ្លែងបែបនេះ នៅក្នុងឱកាសអញ្ជើញជាអធិបតីបើកសិក្ខាសាលាស្ដីពី ការផ្លាស់ប្ដូរបទពិសោធ ក្នុងការប្រយុទ្ធប្រឆាំង បទល្មើសឆបោក តាមប្រព័ន្ធបច្ចេកវិទ្យា និងការសម្អាតប្រាក់ នៅព្រឹកថ្ងៃពុធ ទី៨ ខែតុលានេះ នាទីស្ដីការក្រសួងមហាផ្ទៃ។
លោកបានលើកឡើងដូច្នេះថា៖«ការបណ្ដេញជនបរទេសទាំងនេះ បានឆ្លុះបញ្ចាំងឱ្យឃើញថា រាជរដ្ឋាភិបាល នីតិកាលទី៧ បានយកចិត្តទុកដាក់ខ្ពស់ ទៅលើកិច្ចការងារបទល្មើសអនឡាញ»។
លោកឧបនាយករដ្ឋមន្ដ្រីក៏បានឱ្យដឹងផងដែរថា ក្នុងអាណត្តិទី៦ ក្រោមការដឹកនាំរបស់ អតីតនាយករដ្ឋមន្ដ្រី លោកហ៊ុន សែន និងលោកស ខេង អតីតរដ្ឋមន្រ្តីក្រសួងមហាផ្ទៃ ជនបរទេស ដែលពាក់ព័ន្ធអនឡាញ ប្រមាណជាង ២១ ០០០នាក់ ត្រូវបានបណ្តេញចេញពីកម្ពុជាក្នុងមួយអាណត្តិផងដែរ។
លោកបានគូសបញ្ជាក់ផងដែរថា កិច្ចការងារ បង្ក្រាបបទល្មើសអនឡាញ មិនមែនតែកម្ពុជាម្នាក់ឯងទទួលខុសត្រូវនោះទេ។ លោកបានស្នើដល់បណ្ដាប្រទេសនានា ស្វែងយល់ពីគ្នាទៅវិញ ទៅមក ដើម្បីរួមបង្ក្រាប បទល្មើសអនឡាញ។
លោកមានប្រសាសន៍ថា៖«ការវិវត្តន៍នៃការឆបោកបទល្មើសអនឡាញមានភាពជឿនលឿន បើធៀបនឹង ៥ឆ្នាំមុន គឺមានលក្ខណៈខុសគ្នា។ ការឆបោកបទល្មើសអនឡាញ សម្រាប់ប្រទេសកម្ពុជា មិនមែនជាទីផ្សារ សម្រាប់ក្រុមឧក្រិដ្ឋជននោះទេ គឺពិភពលោក ដូច្នេះ ត្រូវមានការចូលរួមទប់ស្កាត់ពីគ្រប់ភាគីពាក់ព័ន្ធ។
ក្នុងពិធីបើកសិក្ខាសាលានេះ មានការចូលរួមពី រដ្ឋលេខាធិការ អនុរដ្ឋលេខាធិការ នាយឧត្តមសេនីយ៍ អគ្គស្នងការនគរបាលជាតិ អគ្គនាយក អគ្គលេខាធិការដ្ឋាន អគ្គាធិការដ្ឋាន មន្រ្តីពីបណ្ឌិត្យសភានគរបាលកម្ពុជា អគ្គស្នងការរង អគ្គនាយករង ប្រធាន អនុប្រធាននាយកដ្ឋាន ស្នងការនគរបាលរាជធានីខេត្ត វាគ្មិន សមាជិក សមាជិកា និងមន្ត្រីជំនាញពាក់ព័ន្ធចំណុះអគ្គស្នងការដ្ឋាននគរបាលជាតិជាច្រើនរូបទៀតផងដែរ។
Nº.1047
