ជនជាតិវៀតណាមចំនួន៨នាក់ ដែលបានលួចឆ្លងដែនមកធ្វើការខុសច្បាប់ត្រូវបានអាជ្ញាធរកម្ពុជា
បញ្ចូនទៅប្រទេសខ្លួនវិញ
ចេញផ្សាយនៅថ្ងៃទី១៣ ខែតុលា ឆ្នាំ២០២៥
អាជ្ញាធរកម្ពុជាបានបន្តបញ្ជូនឱ្យវៀតណាមវិញនូវជនជាតិរបស់ខ្លួនចំនួន៨នាក់ទៀត ដែលបានលួចឆ្លងដែន និងប្រព្រឹត្តបទល្មើសនៅក្នុងប្រទេសកម្ពុជា
បើតាមអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ ជនជាតិវៀតណាមទាំងនេះ ត្រូវបានអនុវត្តនីតិវិធីបណ្ដេញចេញតាមច្រកទ្វារព្រំដែនអន្តរជាតិព្រែកចាក ខេត្តកំពត កាលពីថ្ងៃទី១០ ខែតុលា ឆ្នាំ២០២៥ តាមការចង្អុលបង្ហាញពីសំណាក់លោកឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
ជនជាតិវៀតណាមទាំង៨នាក់ខាងលើ នាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ទទួលបានពីស្នងការដ្ឋាននគរបាលខេត្តកំពត ចំនួន៣នាក់ ខេត្តកោះកុង ចំនួន៣នាក់ និងទទួលពីពន្ធនាគារខេត្តព្រះសីហនុ ចំនួន ២នាក់ (ស្រី១នាក់)៕
Nº.1056
