ជនភៀសខ្លួនប៉ាឡេស្ទីន ច្រើនសែននាក់ត្រឡប់ទៅផ្ទះវិញ ក្រោយបទឈប់បាញ់ចូលជាធរមាន
ចេញផ្សាយនៅថ្ងៃទី១២ ខែតុលា ឆ្នាំ២០២៥
បទឈប់បាញ់នៅតំបន់ហ្កាហ្សា បានចូលជាធរមានចាប់ពីថ្ងៃសុក្រទី១០តុលា។ ភ្លាមៗនេះ គេសង្កេតឃើញជនភៀសខ្លួនប៉ាឡេស្ទីនច្រើនសែននាក់ បានធ្វើដំណើរត្រលប់ទៅរកផ្ទះសម្បែងវិញ ខ្លះទៅខាងជើង ខ្លះទៅខាងត្បូង បើទោះបីជាឃើញតែគំនរអគារបាក់បែក ខ្ទេចខ្ទីរដោយសារតែសង្គ្រាម២ឆ្នាំ។ លោកដូណាល់ ត្រាំ បានអបអរសាទរខ្លួនឯង និងបានអះអាងថាលោកសង្ឃឹមថាបទឈប់បាញ់នេះ នឹងរឹងមាំជាធរមានយូរអង្វែង។
នៅព្រឹកថ្ងៃសៅរ៍ ទី១១តុលា ផ្អែកតាមអង្គការប្រជាការពារហ្កាហ្សា គឺមានជនភៀសខ្លួនប៉ាឡេស្ទីនសរុប មិនក្រោម២សែននាក់ទេ ដែលកំពុងតែនាំគ្នាធ្វើដំណើរ ខ្លះដើរ ខ្លះជិះកង់ជិះរទេះ ទូលស្ពាយបង្វិចសម្ភារៈ ដើម្បីវិលត្រលប់ទៅផ្ទះសម្បែងវិញ ដែលស្ថិតនៅតំបន់ភាគខាងជើងហ្កាហ្សា។ ស្របពេលគ្នានេះ ប្រជាជនប៉ាឡេស្ទីនច្រើនម៉ឺននាក់ទៀត បានធ្វើដំណើរចាកចេញពីជំរុំបណ្តោះអាសន្ន ត្រលប់ទៅទិសខាងត្បូង ត្រង់តំបន់ខាន់យូណែស។
អស់រយៈពេល២ឆ្នាំមកហើយ ដែលពួកគេបានរត់ភៀសខ្លួន គេចពីគ្រាប់បែកនិងមីស៊ីលរបស់អ៊ីស្រាអែល ម្តងទៅខាងជើង ម្តងទៅខាងត្បូង។ បទឈប់បាញ់ ដែលបានចូលជាធរមានកាលពីថ្ងៃសុក្រ ទី១០តុលា គឺជាអ្វីដែលប្រជាជនប៉ាឡេស្ទីន ទន្ទឹងរងចាំសឹងតែអស់សង្ឃឹមរលីងទៅហើយ។ ទោះបីជាអគារផ្ទះសម្បែង ត្រូវបាក់បែកខ្ទេចខ្ទីរសឹងទាំងស្រុង តែប្រជាជនប៉ាឡេស្ទីន បានអះអាងថាគេរីករាយ ត្រេកអរនឹងត្រលប់ទៅទីកន្លែងដែលធ្លាប់រស់នៅវិញ ហើយបន់ព្រះសូមឲ្យភ្លើងសង្គ្រាមត្រូវរលត់ចាប់ពីពេលនេះទៅជារៀងរហូត។
សូមបញ្ជាក់ថា បទឈប់បាញ់រវាងអ៊ីស្រាអែលនិងក្រុមហាម៉ាស ដោយមាន កាតា និងអេហ្ស៊ីបជាអ្នកសម្របសម្រួល គឺជាផែនការឈប់បាញ់ស្នើដោយលោកដូណាល់ ត្រាំ ដែលមាន២០ចំណុច ក្នុងនោះគឺ កងទ័ពអ៊ីស្រាអែលត្រូវដកថយក្នុងជំហានដំបូង គ្រប់គ្រងតែប្រមាណ៥៣%នៃដែនដីតំបន់ហ្កាហ្សា។ ក្រុមហាម៉ាសត្រូវប្រគល់ចំណាប់ខ្មាំងដែលនៅសល់ ចំនួន៤៨នាក់ ក្នុងនោះមាន២៨នាក់បានស្លាប់ហើយ។ ចំណែកអ៊ីស្រាអែលវិញ ត្រូវដោះលែងអ្នកទោសប៉ាឡេស្ទីនចំនួន២៥០នាក់ ដែលជាប់ទោសពីបទគំរាមសន្តិសុខជាតិអ៊ីស្រាអែល ព្រមទាំងត្រូវដោះលែងប្រជាជនប៉ាឡេស្ទីនប្រមាណ១៧០០នាក់ទៀត ដែលកងទ័ពអ៊ីស្រាអែលបានចាប់ខ្លួន ក្រោយថ្ងៃទី៧តុលា២០២៣។ ដោយឡែក នៅមានភាពស្រពិចស្រពិលនៅឡើយ ទាក់ទិននឹងការរំសាយអាវុធទាំងស្រុង របស់ក្រុមហាម៉ាស។
ភ្លាមៗក្រោយការចូលជាធរមាននៃបទឈប់បាញ់នេះដែរ ក្រុមសង្រ្គោះនៅហ្កាហ្សា បានប្រញេបប្រញាប់រើកកាយស្វែងរកអ្នកបាត់ ខ្លួននិងសាកសពមនុស្សដែលជាប់ក្នុងគំនរបាក់បែក។ អង្គការប្រជាការពារហ្កាហ្សាបានអះអាងថា គ្រាន់តែក្នុងទីក្រុង ហ្កាហ្សាស៊ីធីមួយ គេបានរកឃើញសាកសពមនុស្ស៦៣នាក់ នៅថ្ងៃសុក្រទី១០តុលា។ ចំណែកសមាគមអ្នកកាសែតបរទេស នៅទីក្រុងហ្សេរុយសាឡឹមវិញ បានស្នើសុំភ្លាមៗដែរ ដើម្បីឲ្យអ្នកកាសែតបរទេសអាចចូលទៅតំបន់ហ្កាហ្សាដោយសុវត្ថិភាព ព្រោះថា២ឆ្នាំមកនេះ អាជ្ញាធរអ៊ីស្រាអែលបានរារាំងជាប់ជាប្រចាំ។
តាមការគ្រោងទុក នៅចុងសប្តាហ៍នេះ លោកដូណាល់ ត្រាំ នឹងធ្វើដំណើរមកតំបន់ដើមបូព៌ា ដោយលោកនឹងទៅថ្លែងសារនៅសភាក្នេសេតរបស់អ៊ីស្រាអែល នៅក្រុងហ្សេរុយសាឡិម។
Nº.1055
