ជនសង្ស័យជាឃាតករសម្លាប់ លោកCharlie Kirk ត្រូវជាប់ទោសប្រហារជីវិត
ចេញផ្សាយនៅថ្ងៃទី១៨ ខែកញ្ញា ឆ្នាំ២០២៥
ជនសង្ស័យឈ្មោះ Tyler Robinson ដែលជាឃាតករបាញ់សម្លាប់ លោក Charlie Kirk កាលពីថ្ងៃពុធទី១០កញ្ញា នៅរដ្ឋយូតា ត្រូវបានគេនាំខ្លួនចូលទៅកាន់សវនាការជាលើកទី១។ រដ្ឋអាជ្ញាអាមេរិក បានសម្រេចចោទប្រកាន់ជនសង្ស័យរូបនេះពីបទមនុស្សឃាត និងបានទាមទារទោសប្រហារជីវិត។ ឃាតកម្មលើរូបលោក លោក Charlie Kirk ដែលជាអ៊ីនហ្វ្លូអិនស៊ឺស្តាំនិយមជ្រុល ស្និទ្ធនឹងលោកដូណាល់ ត្រាំ បានមកហែកហួរសង្គមក៏ដូចជានយោបាយអាមេរិក ឲ្យកាន់តែប្រឈមមុខដាក់គ្នាយ៉ាងហិង្សាបំផុត។
Tyler Robinson អាយុ២២ឆ្នាំ ដែលជាជនសង្ស័យឃាតករសម្លាប់ លោក Charlie Kirk ត្រូវបានសមត្ថកិច្ចបញ្ជូនខ្លួនចូលជួបចៅក្រម ជាលើកទី១។ លោកចៅក្រម Tony Graf នៃតុលាការឧក្រិដ្ឋតំបន់យូតា បានអានបទចោទប្រកាន់ទាំងអស់៧ករណីទៅលើជនសង្ស័យ ក្នុងនោះមានបទល្មើសមនុស្សឃាតដោយចេតនា។ ជនសង្ស័យមិនអាច ប្រើប្រាក់ធានាដើម្បីសុំនៅក្រៅឃុំបានទេ។ Tyler Robinson មិនមាត់ឆ្លើយតបអ្វីទេ គឺបានត្រឹមតែងក់ក្បាល។ សវនាការបន្ទាប់ នឹងត្រូវធ្វើនៅថ្ងៃទី២៩កញ្ញា។
គួរបញ្ជាក់ថា រដ្ឋអាជ្ញាអាមេរិកប្រចាំតំបន់យូតា បានចោទប្រកាន់ Tyler Robibson ពីបទមនុស្សឃាតមានស្ថានទំងន់២ផ្ទួនៗគ្នា គឺទីមួយ ជាអំពើមនុស្សឃាតដោយគិតទុកជាមុន ក្រោមហេតុផលនៃការបញ្ចេញមតិនយោបាយរបស់ជនរងគ្រោះ និងទី២ គឺឃាតកម្មនេះបានធ្វើឡើង ទាំងដែលជនសង្ស័យដឹងថា មានវត្តមានរបស់កុមារ អនីតិជន នៅទីកន្លែងកើតហេតុផ្ទាល់។ រដ្ឋអាជ្ញាបានទាមទារ ទោសប្រហារជីវិតទៅលើជនសង្ស័យ Tyler Robibson។
សូមរំលឹកថា ករណីឃាតកម្មលើរូប លោក Charlie Kirk បានកើតឡើងនៅក្នុងកម្មវិធីជួបជុំមួយនៅក្នុងសកលវិទ្យា យូតា សហរដ្ឋអាមេរិក កាលពីថ្ងៃពុធទី១០កញ្ញា។ ឃាតករបានប្រើកាំភ្លើងស្នៃភើ បាញ់មួយគ្រាប់ចំកញ្ចឹងកជនរងគ្រោះ បណ្តាលឲ្យស្លាប់ភ្លាមនៅនឹងកន្លែង។ បន្ទាប់ពីបានរត់គេចខ្លួន នៅថ្ងៃបន្ទាប់គឺថ្ងៃទី១១កញ្ញា ជនសង្ស័យឈ្មោះ Tyler Robibson បានប្រគល់ខ្លួនឲ្យសមត្ថកិច្ចដោយខ្លួនឯង បន្ទាប់ពីឪពុកម្តាយរបស់ជននេះបាននិយាយបញ្ចុះបញ្ចូល។ ឪពុកម្តាយរបស់ជនដៃដល់បានប្រាប់បណ្តាញព័ត៌មានអាមេរិកថា កូនប្រុសអាយុ២២ឆ្នាំរបស់ខ្លួន ធ្លាប់បានបង្ហើបប្រាប់ជារឿយៗ ពីទឹកចិត្តស្អប់ដ៏ខ្លាំងក្លាបំផុត ទៅលើលោក Charlie Kirk ដែលជាអ្នកផ្សព្វផ្សាយចរន្តទ្រឹស្តីគំនិតស្អប់ខ្ពើមគ្នាក្នុងសង្គម។
សូមបញ្ជាក់ថា លោក Charlie Kirk អាយុ៣១ឆ្នាំ គឺជាអ៊ីនហ្វ្លូអិនស៊ឺនយោបាយ ទំនោរស្តាំនិយមជ្រុល អភិរក្សនិយមជ្រុល ដ៏មានប្រជាប្រិយភាពម្នាក់នៅអាមេរិក។ Charlie Kirk បានប្រើប្រាស់បណ្តាញសង្គម ដែលមានអ្នកតាមដានច្រើនលាននាក់ ដើម្បីឃោសនាផ្សព្វផ្សាយទ្រឹស្តីគំនិតបែបសាសនាគ្រិស្តតឹងរឹង ជាតិនិយមជ្រុល អភិរក្សនិយមជ្រុល។ ជាតម្លៃគំនិតដែលរើសអើងទៅលើអ្នកស្រលាញ់ភេទដូចគ្នា និងប្រឆាំងនឹងសិទ្ធិរំលូតកូនរបស់ស្ត្រីជាដើម។ល។ ឥទ្ធិពលនៃការការឃោសនាយោបាយបែបស្តាំនិយមជ្រុលរបស់ Charlie Kirk បានចូលរួមយ៉ាងខ្លាំង ជួយឲ្យលោកដូណាល់ ត្រាំ បានជ័យជំនះក្នុងការបោះឆ្នោតអាណត្តិថ្មី។
គួរកត់សំគាល់ថា ឃាតកម្មសម្លាប់លោក Charlie Kirk ទាំងកណ្តាលថ្ងៃ បានស្តែងឲ្យឃើញ កាន់តែច្បាស់ អំពីភាពហិង្សានយោបាយនៅសហរដ្ឋអាមេរិក។ ប៉ុន្មានឆ្នាំចុងក្រោយនេះ សង្គមអាមេរិកក៏ដូចជាឆាកនយោបាយ ត្រូវពុះចែក ប្រឈមមុខដាក់គ្នាកាន់តែខ្លាំងឡើងៗ រវាងចរន្តគំនិតជាតិនិយមជ្រុលបែបអភិរក្សនិយម ដែលមានលោកដូណាល់ ត្រាំជាអ្នកស្រែកបំពងសំឡេង និងចរន្តគំនិតចំរើននិយម ឆ្វេងនិយម ដែលមានទំនោរកាន់តែហិង្សាទៅ។ ចលនាឆ្វេងនិយមជ្រុល ឬ Antifasciste ដែលលោកដូណាល់ ត្រាំតែងតែងអះអាងថាគឺមានបក្សប្រជាធិបតេយ្យនៅពីក្រោយ។
Nº.1015
