តុលាការចិនកាត់ទោសប្រហារជីវិត មេខ្លោងឧក្រិដ្ឋកម្មអនឡាញនៅភូមា
ចេញផ្សាយនៅថ្ងៃទី៣០ ខែកញ្ញា ឆ្នាំ២០២៥
នៅប្រទេសចិន តុលាការWenzhou នៅទីក្រុងកាលពីថ្ងៃចន្ទទី ២៩កញ្ញាបានសម្រេចកាត់ទោសប្រហារជីវិតមនុស្ស១៦នាក់ និងផ្តន្ទាទោសមនុស្ស២៣នាក់ផ្សេងទៀតឲ្យជាប់ពន្ធនាគារពី ៥ឆ្នាំ រហូតដល់មួយជីវិត ក្នុងបទចោទប្រកាន់ប្រព្រឹត្តឧក្រិដ្ឋកម្មអនឡាញ ល្បែងខុសច្បាប់ ជួញដូរគ្រឿងញៀន និងអំពើពេស្យាចារនៅក្នុងមជ្ឈមណ្ឌលបោកប្រាស់អនឡាញក្នុងទឹកដីភូមា។ យោងតាមការចុះផ្សាយរបស់ទូរទស្សន៍រដ្ឋចិន ក្រុមឧក្រិដ្ឋជនមួយចំនួនធំដែលតុលាការកាត់ទោសកាលពីថ្ងៃចន្ទ ជាសមាជិករបស់គ្រួសារត្រកូល Mingដែលពង្រីកអំណាច កើបលុយរាប់ពាន់លានដុល្លារពីឧក្រិដ្ឋកម្មឆ្លងដែន។
ក្រុមឧក្រិដ្ឋជនពាក់ព័ន្ធនឹងមជ្ឈមណ្ឌលឆបោកអនឡាញដ៏សំខាន់មួយនៅក្នុងទឹកដីភូមា ត្រូវតុលាការចិននៅទីក្រុង Wenzhouសម្រេចផ្តន្ទាទោសប្រហារជីវិត កាលពីថ្ងៃចន្ទទី ២៩កញ្ញា។ យោងតាមប្រព័ន្ធផ្សព្វផ្សាយរដ្ឋចិន មនុស្ស១៦នាក់ត្រូវតុលាការចិនកាត់ទោសប្រហារជីវិត ចំណែក មនុស្ស២៣នាក់ផ្សេងទៀតត្រូវផ្តន្ទាទោសឲ្យជាប់ពន្ធនាគារ ពី ៥ឆ្នាំ រហូតដល់អស់មួយជីវិត។
តុលាការចិនបានបើកសវនាការជំនុំជម្រះឧក្រិដ្ឋជនជាង៣០នាក់ តាំងពីខែ កុម្ភៈដើមឆ្នាំនេះ បន្ទាប់ពីពួកគេត្រូវបានចាប់ខ្លួននៅតំបន់កូកាំងក្នុងទឹកដីភូមា ជាប់ព្រំដែនជាមួយចិន។ បើតាមសេចក្តីប្រកាសព័ត៌មានរបស់តុលាការWenzhou ឧក្រិដ្ឋជនទាំងនោះជាសមាជិករបស់ក្រុមជនពាលដែលមានរចនាសម្ព័ន្ធច្បាស់លាស់ បង្កើតឡើងដោយគ្រួសារដ៏មានអំណាច មានលុយ ត្រកូល Ming។ បន្ទាប់ពីត្រូវចាប់ខ្លួន គ្រួសារត្រកូលMing ត្រូវបានចោទប្រកាន់ថា មានជាប់ពាក់ព័ន្ធនឹងឧក្រិដ្ឋកម្មជាច្រើន ប្រព្រឹត្តឡើងនៅក្នុងទឹកដីភូមា ដូចជា ឃាតកម្មសម្លាប់មនុស្ស បើកបនល្បែងខុសច្បាប់ ជួញដូរមនុស្ស និងជាពិសេស បើកមជ្ឈមណ្ឌលឆបោកអនឡាញជាច្រើនកន្លែងនៅក្នុងទឹកដីភូមា ជាប់ព្រំដែនចិន។
ភូមាបានក្លាយជាឋានសួគ៍របស់ក្រុមឧក្រិដ្ឋជន ដែលបានឆ្លៀតឱកាសក្នុងសង្រ្គាមស៊ីវិល និងអសន្តិសុខក្នុងប្រទេសភូមា ដើម្បីបង្កើតមជ្ឈមណ្ឌលឆបោកអនឡាញ។ បើតាមតុលាការចិន សមាជិករបស់គ្រួសារត្រកូលMingបានចំណាយលុយទិញអាវុធ ជួលក្រុមជនពាលប្រដាប់អាវុធដើម្បីការពារមជ្ឈមណ្ឌលឆបោកអនឡាញ និងទីតាំងខុសច្បាប់ជាច្រើនកន្លែងរបស់ខ្លួននៅក្នុងតំបន់Kokang របស់ភូមា។ ក្រៅពីរងការចោទប្រកាន់ថា ជាអ្នកទទួលខុសត្រូវលើឃាតកម្មសម្លាប់មនុស្ស១០នាក់ ដែលព្យាយាមរត់គេចចេញពីមជ្ឈមណ្ឌលបោកប្រាស់ នៅភូមា សមាជិករបស់គ្រួសារត្រកូលMing និងបក្ខពួកត្រូវតុលាការចិនរកឃើញថា បានគៃបន្លំ ទាញយកប្រយោជន៍ពីបណ្តាញសារទូរគមនាគមន៍ចិន ជួញដូរគ្រឿងញៀន បើកបនល្បែង និងសកម្មភាពឧក្រិដ្ឋកម្មផ្សេងទៀត ដែលផ្តល់ប្រាក់ចំណូលប្រមាន ១២០០លានដុល្លារ។
ដោយឃើញថា ជនជាតិចិនរងគ្រោះច្រើនជាងគេ ក៏ព្រោះតែសកម្មភាពឆបោកអនឡាញនិង ល្បែងស៊ីសងខុសច្បាប់ដែលមានប្រភពចេញមកពីទឹកដីភូមា ចិនដែលជាសម្ព័ន្ធមិត្តគាំទ្រ និងផ្គត់ផ្គង់សព្វាវុធឲ្យរបបសឹកភូមា និងក្រុមឧទ្ទាមគ្រប់គ្រងតំបន់Kokang បានដាក់សម្ពាធលើអាជ្ញាធរភូមាឲ្យចូលរួមបង្រ្កាបឧក្រិដ្ឋកម្មឆ្លងដែន។ នៅខែកុម្ភៈ ដើមឆ្នាំនេះចិនបានសហការជាមួយថៃ និងភូមាក្នុងប្រតិបត្តិការចាប់បញ្ជូនជនជាតិចិន ជាច្រើនរយនាក់ដែលបានចាញ់បោក ឬធ្វើការដោយស្ម័គ្រចិត្តនៅមជ្ឈមណ្ឌលឆបោកអនឡាញនៅតាមព្រំដែនភូមាថៃ។
របាយការណ៍របស់អង្គការសហប្រជាជាតិនៅឆ្នាំ២០២៣បង្ហាញថា យ៉ាងហោចមនុស្សជាង១២០ ០០០នាក់ធ្វើការនៅមជ្ឈមណ្ឌលឆបោកអនឡាញ ដែលដុះដូចផ្សិតនៅប្រទេសភូមា ជាពិសេសនៅតំបន់ជាប់ព្រំដែន។
Nº.1032
