ក្រសួងសុខាភិបាល បានប្រកាសពីការកើនឡើងនៃជំងឺពងបែកដៃ ជើង និងមាត់ លើកុមារ
ចេញផ្សាយនៅថ្ងៃទី១៧ ខែកញ្ញា ឆ្នាំ២០២៥
ក្រសួងសុខាភិបាល បានប្រកាសពីការរកឃើញករណីជំងឺពងបែកដៃ ជើង និងមាត់ មានការកើនឡើងជាបន្តបន្ទាប់ ជាពិសេសក្នុងចំណោមកុមារអាយុក្រោម ៥ឆ្នាំ។
ក្រសួងបានអំពាវនាវដល់ប្រជាពលរដ្ឋ ត្រូវយកចិត្តទុកដាក់ និងអនុវត្តវិធានការបង្ការ ការពារជំងឺនេះ ដើម្បីសុវត្ថិភាពសុខភាពរបស់កូនចៅ។
យោងតាមសេចក្ដីប្រកាសព័ត៌មាន បានបង្ហាញថា៖ «ជំងឺពងបែកដៃ ជើង និងមាត់ គឺជាជំងឺឆ្លងមួយប្រភេទ បង្កដោយពពួកអង់តេរ៉ូវីរុស (enteroviruses) ជាញឹកញាប់គឺ ពួកវីរុសកុកសាគី (coxsackievirus) ភាគច្រើនកើតលើ ទារក និងកុមារ ប៉ុន្តែក៏អាចកើតលើមនុស្ស ពេញវ័យផងដែរ»។
របៀបចម្លង៖ ជំងឺពងបែក ដៃ ជើង និងមាត់ អាចឆ្លង ពីមនុស្សម្នាក់ទៅមនុស្សម្នាក់ទៀត តាមរយៈការប៉ះពាល់ដោយផ្ទាល់ជាមួយនឹងវត្ថុរាវនៃផ្លូវដង្ហើម (ទឹកមាត់ កំហាក និងសំបោរ) ទឹករងៃ ដែលចេញពីពងបែក លាមកអ្នកជំងឺ។
ក្រសួងសុខាភិបាលបានព្រមានថា៖ «អ្នកជំងឺអាចចម្លងខ្លាំងបំផុតក្នុងសប្តាហ៍ទីមួយ។ ជំងឺពងបែក ដៃ ជើង និងមាត់ មិនឆ្លងពីមនុស្ស ទៅសត្វឬពីសត្វមកមនុស្សឡើយ»។
រោគសញ្ញា៖ មានគ្រុនក្តៅ មានដំបៅឈឺក្នុងមាត់ និង មានពងកន្ទួល លើបាតដៃ បាតជើង និង កំប៉េះគូទ
ជំងឺពងបែក ដៃជើង និងមាត់ ភាគច្រើនមានស្ថានភាពស្រាល អ្នកជំងឺស្ទើរតែទាំងអស់ជាសះស្បើយ ក្នុងរយៈពេលពី ៧ថ្ងៃ ទៅ១០ថ្ងៃ ហើយកម្រមានផលវិបាកណាស់ (អ្នកជំងឺអាចត្រូវការថ្នាំបញ្ចុះកំដៅ ថ្នាំបំបាត់ការឈឺចាប់ ដែលបណ្តាលមកពីពងបែកក្នុងមាត់ តែមិនត្រូវប្រើថ្នាំ អាស្ដីរីន (aspirin) ដើម្បីបញ្ចុះកំដៅឡើយ)។
យ៉ាងណាមិញ ជាកម្រ ជំងឺពងបែក ដៃ ជើង និងមាត់ អាចបង្កឱ្យមានផលវិបាកធ្ងន់ធ្ងរមួយចំនួន រួមមាន រោគសញ្ញា ប្រព័ន្ធប្រសាទ (សន្លឹម ប្រកាច់ ឬ កន្ត្រាក់ដៃជើង) និងរោគសញ្ញាផ្លូវដង្ហើម (ពិបាកដកដង្ហើម ហត់)។
សេចក្ដីប្រកាសបានបញ្ជាក់៖ «អ្នកជំងឺដែលមានផលវិបាកធ្ងន់ធ្ងរខាងលើនេះ ត្រូវប្រញាប់បញ្ជូនជាបន្ទាន់ ទៅមណ្ឌលសុខភាព ឬមន្ទីរពេទ្យ ដែលនៅជិតបំផុត ចៀសវាងការពន្យារពេល ធ្វើឱ្យប្រឈមហានិភ័យខ្ពស់នៃជំងឺ»។
របៀបបង្ការ៖
ក្រសួងសុខាភិបាលបានណែនាំនូវវិធានការបង្ការសំខាន់ៗ ដូចជា រក្សាអនាម័យដៃឱ្យបានល្អ សម្អាតផ្ទៃ និងសម្ភារៈ
ចៀសវាងការប៉ះពាល់ជិតស្និទ្ធ សម្ភារៈបរិភោគដាច់ដោយឡែក ឱ្យកុមារនៅផ្ទះ ឪពុកម្ដាយ និងអ្នកថែទាំ ការទទួលទានអាហារដែលមានជីវជាតិច្រើន និងទឹកឱ្យបានគ្រប់គ្រាន់ដល់កុមារ ក៏ដូចជាជៀសវាងទីប្រជុំជន។
ក្រសួងសុខាភិបាលនឹងបន្តធ្វើការជូនដំណឹងអំពីព័ត៌មានសុខភាពសាធារណៈតាមបណ្តាញសង្គមផ្លូវការ និង។
Nº.1011
