ប្រមុខការបរទេសអាមេរិក ទៅជួបលោក នេតាន់យ៉ាហ៊ូ ដើម្បីបញ្ជាក់ការគាំទ្រ
ចេញផ្សាយនៅថ្ងៃទី១៦ ខែកញ្ញា ឆ្នាំ២០២៥៖
រដ្ឋមន្ត្រីការបរទេសអាមេរិក លោក ម៉ារកូ រ៉ូប៊ីយ៉ូ កំពុងតែបន្តបំពេញដំណើរទស្សនកិច្ចនៅអ៊ីស្រាអែល។ ដំណើរទស្សនកិច្ចរបស់ប្រមុខការទូតអាមេរិកនេះ ធ្វើឡើងដើម្បីបញ្ជាក់ពីការគាំទ្រចំពោះអ៊ីស្រាអែល ហើយពិភាក្សាអំពីផលវិបាក និងចំណាត់ការបន្តទៀត ក្រោយពីកងទ័ពអ៊ីស្រាអែល បានបាញ់ប្លោងគ្រាប់សម្លាប់ពួកមេដឹកនាំក្រុមប្រដាប់អាវុធហាម៉ាស ក្នុងទឹកដីកាតា។ ប្រតិបត្តិការវាយប្រហារនោះ ធ្វើឲ្យប្រធានាធិបតីអាមេរិក លោកដូណាល់ ត្រាំ មិនសប្បាយចិត្ត និងបានទូន្មានឲ្យអ៊ីស្រាអែលប្រុងប្រយ័ត្ន ព្រោះ ប្រទេសកាតា ក៏ជាមហាមិត្តរបស់អាមេរិកដែរ។
ប្រមុខទូតអាមេរិក លោក ម៉ារកូ រ៉ូប៊ីយ៉ូ អញ្ជើញទៅទីក្រុងហ្សេរ៉ូស្សាឡឹម ដើម្បីបញ្ជាក់អំពីការគាំទ្រអ៊ីស្រាអែល ហើយពិភាក្សាពីផលវិបាក ក្រោយវាយប្រហារសម្លាប់ពួកហាម៉ាសនៅកាតា។ នៅថ្ងៃអាទិត្យ ទី១៤កញ្ញា ជាពិធីសាសនា។ ជាអ្នកប្រកាន់គ្រិស្តសាសនានិកាយកាតូលិក លោក ម៉ារកូ រ៉ូប៊ីយ៉ូ បានត្រូវនាយករដ្ឋមន្ត្រីអ៊ីស្រាអែល លោក បេនចាមិន នេតាន់យ៉ាហ៊ូ អញ្ជើញឲ្យទៅគោរព«ជញ្ជាំងនៃសេចក្តីទុក្ខព្រួយ» ដែលជាទីសក្ការៈបូជារបស់ជនជាតិជ្វីហ្វ។ ចូលស្ទឹងតាមបត់! ប្រមុខទូតអាមេរិក តម្រូវឲ្យពាក់មួកកាតិបដូចជ្វីហ្វដែរ។
ថ្ងៃចន្ទ ទី១៥កញ្ញា ថ្នាក់ដឹកនាំទាំង២ ត្រូវពិភាក្សាគ្នាលើសំណុំរឿងជាច្រើន។ រដ្ឋមន្ត្រីការបរទេសសហរដ្ឋអាមេរិក លោក ម៉ារកូ រ៉ូប៊ីយ៉ូ ធ្លាប់បានបញ្ជាក់ប្រាប់អ្នកកាសែតថា លោកត្រូវជជែកពិភាក្សាជាមួយប្រមុខរដ្ឋាភិបាលអ៊ីស្រាអែល អំពីប្រតិបត្តិការយោធានៅទីប្រជុំជនក្រុងហ្កាហ្សា និងអាណានិគមកិច្ចអ៊ីស្រាអែលនៅតំបន់ស៊ីហ្សកដានី។ ប្រមុខទូតអាមេរិក ក៏បានបញ្ជាក់ជាថ្មីនូវជំហររបស់ប្រធានាធិបតីអាមេរិក លោក ដូណាល់ ត្រាំ ដែលចង់ឲ្យបញ្ចប់សង្គ្រាមហ្កាហ្សា ដោយភ្ជាប់លក្ខខណ្ឌចាំបាច់ថាត្រូវតែដោះលែងចំណាប់ខ្មាំងទាំងអស់ ហើយពួកហាម៉ាសនឹងមិនក្លាយជាប្រភពគំរាមកំហែងសន្តិសុខអ៊ីស្រាអែល។
ជំនួបរវាងថ្នាក់ដឹកនាំទាំង២នៅគ្រានេះ បានធ្វើឡើងតែ១សប្តាហ៍ ក្រោយពីកងទ័ពអ៊ីស្រាអែលបាញ់ប្លោងទៅលើទឹកដីកាតា និងបានសម្លាប់មនុស្ស ៥ នាក់។ ក្នុងនោះ ៤នាក់ ជាមេដឹកនាំនិងអ្នកចរចាតំណាងពួកប្រដាប់អាវុធហាម៉ាស ហើយអ្នកស្លាប់ម្នាក់ទៀត ជាមន្ត្រីសន្តិសុខកាតា។
អាមេរិកជាសម្ព័ន្ធធំទី១របស់អ៊ីស្រាអែល ហើយកាតាក៏ជាមហាមិត្តរបស់អាមេរិកដែរ។ កាតាបានទទួលឲ្យកងទ័ពអាមេរិកដាក់មូលដ្ឋានយោធានៅលើទឹកដីកាតា ដែលគេអាចចាត់ទុកថាជាមូលដ្ឋានដ៏ធំសម្បើម នៅតំបន់មជ្ឈិមបូព៌ា។ ម្ល៉ោះហើយ ទើបចៅហ្វាយសេតវិមានអាមេរិក លោក ដូណាល់ ត្រាំ បានផ្តល់ដំបូន្មានពីក្រុងវ៉ាស៊ីនតោន មកថា អ៊ីស្រាអែលនិងសម្ព័ន្ធផ្សេងទៀត ត្រូវតែប្រុងប្រយ័ត្នឲ្យមែនទែន កាលណាវាយប្រហារសម្លាប់មនុស្ស ដ្បិតថា កាតាក៏ជាមហាមិត្តរបស់សហរដ្ឋអាមេរិកដែរ។
យ៉ាងណាក៏ដោយចុះ វត្តមានរបស់លោកប្រមុខទូតអាមេរិកនៅអ៊ីស្រាអែល ពុំមែនជាការស្តីបន្ទោសនោះទេ តែជាការបញ្ជាក់ពីជំហរគាំទ្ររបស់អាមេរិកចំពោះអ៊ីស្រាអែល។ ការគាំទ្រឥតងាករេនេះ គឺតាមរយៈការសរសេរក្នុងបណ្តាញសង្គមX ដែលលោក ម៉ារកូ រ៉ូប៊ីយ៉ូ ប្រកាសថា ហ្សេរ៉ូស្សាឡឹម ជារដ្ឋធានីពីយូរយារចីរកាល របស់អ៊ីស្រាអែល។ ស្របគ្នានេះដែរ លោក បេនចាមិន នេតាន់យ៉ាហ៊ូ បានសាទរថា ទំនាក់ទំនងអាមេរិក-អ៊ីស្រាអែល មិនដែលល្អរឹងមាំដូចគ្រានេះឡើយ។
គួររំឭកជូនថា មានតែសហរដ្ឋអាមេរិក១ប៉ុណ្ណោះ ដែលទទួលស្គាល់ ហ្សេរ៉ូស្សាឡឹម ជារដ្ឋធានី របស់អ៊ីស្រាអែល។ សហប្រជាជាតិមិនទទួលស្គាល់ទេ ហើយចំណែកឯ អាជ្ញាធរប៉ាឡេស្ទីន មិនត្រឹមតែច្រានចោលទេ ក៏ថែមទាំងទាមទារថាជា រដ្ឋធានីរបស់ខ្លួនដែរ។
Nº.1010
