លោកហ្សេឡេនស្គី ស្នើបង្កើត “ប្រព័ន្ធខែលការពារផ្លូវអាកាសរួមគ្នា” ជាមួយប្រទេសសម្ព័ន្ធមិត្ត

លោកហ្សេឡេនស្គី ស្នើបង្កើត “ប្រព័ន្ធខែលការពារផ្លូវអាកាសរួមគ្នា” ជាមួយប្រទេសសម្ព័ន្ធមិត្ត

ចេញផ្សាយនៅថ្ងៃទី១ ខែតុលា ឆ្នាំ២០២៥

ប៉ុន្មានសប្តាហ៍ចុងក្រោយនេះ ដែនអាកាសខាងជើងនិងខាងកើតអឺរ៉ុប បានរងនូវការគំរាមផ្ទួនៗគ្នា ពីសំណាក់ដ្រូនអនាមិក និងយន្តហោះចម្បាំងរបស់រុស្ស៊ី។ ក្រុមប្រទេសអឺរ៉ុប បានជួបប្រជុំគ្នានៅប៉ូឡូញកាលពីថ្ងៃចន្ទទី២៩កញ្ញា ដើម្បីរកដំណោះស្រាយទប់ទល់នឹងការគំរាមសម្លុតទាំងនេះ។ លោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គីបានស្នើថា អ៊ុយក្រែននិងក្រុមប្រទេសសម្ព័ន្ធមិត្ត អាចរួមគ្នាបង្កើតប្រព័ន្ធខែលការពារផ្លូវអាកាសរួម ព្រោះប៉ុន្មានឆ្នាំមកនេះ អ៊ុយក្រែនបានទទួលបទពិសោធន៍ច្រើន ទាំងបច្ចេកវិទ្យានិងតាក់ទិក ដើម្បីទប់ទល់ជាមួយដ្រូនរបស់រុស្ស៊ី។

តើត្រូវធ្វើយ៉ាងណា ដើម្បី ការពារសន្តិសុខផ្លូវអាកាសរបស់បណ្តាប្រទេសអឺរុប និង អ៊ុយក្រែន ទល់នឹងការគំរាមសម្លុត ផ្ទួន ៗ ពី សំណាក់ ប្រទេសដែលមានចិត្តជាមារ? កាលពីថ្ងៃចន្ទទី ២៩ កញ្ញា នៅក្នុង ឱកាសប្រជុំវេទិកាសន្តិសុខប្រចាំឆ្នាំ នៅទីក្រុងវ៉ារសូវី លោក វ្លូឌីមៀរ ហ្សេឡេនស្គី បាន បញ្ជាក់ថា អ៊ុយក្រែន សូមស្នើយោបល់ ទៅកាន់ប៉ូឡូញ និង ក្រុមប្រទេស សម្ព័ន្ធមិត្តអឺរ៉ុបទាំងអស់ បង្កើតប្រព័ន្ធខែលការពារផ្លូវ អាកាសរួមគ្នា ដែលរឹងមាំគួរឲ្យទុកចិត្ត ដើម្បី ទប់ទល់ជាមួយ នឹងការគំរាមរបស់រុស្ស៊ី។ លោកប្រធានាធិបតីអ៊ុយក្រែនបានធានាអះអាង ថា គម្រោងនេះគឺពិតជាអាចធ្វើទៅរួច ព្រោះថាយើងរួមគ្នាទូទាំងតំបន់ ហើយយើងមាន គ្រឿងសព្វាវុធគ្រប់គ្រាន់ ព្រមទាំងមាន សមត្ថភាពផលិត បាន ។

គួរបញ្ជាក់ថា ថ្នាក់ដឹកនាំប្រទេសអូតង់បានអះអាងថា តាមរយៈដ្រូន អនាមិកនិង យន្តហោះចម្បាំងចូលក្នុងដែនអាកាសប្រទេសអឺរ៉ុប គឺ រុស្ស៊ី កំពុងតែ ចង់សាកល្បង ចង់ដឹង កម្លាំងប្តេជ្ញារបស់អូតង់ ។ អ៊ុយក្រែន បានលើកឡើងថា បទពិសោធន៍ ដែលខ្លួនមាន នៅក្នុង ការ ប្រយុទ្ធទប់ទល់នឹង ការគំរាមផ្លូវអាកាសរបស់រុស្ស៊ី គឺជាចំណុចដ៏វិជ្ជមានដែលអ៊ុយក្រែនអាចចូលរួមជួយ។ កន្លងមក ទាំង មន្ត្រីកងទ័ពនិង វិស្វករជំនាញ អ៊ុយក្រែន បានជួយបណ្តុះបណ្តាល អ្នកជំនាញប៉ូឡូញច្រើននាក់ហើយ នៅក្នុងប្រតិបត្តិការទប់ទល់ដ្រូន របស់រុស្ស៊ី។

ក្នុងពេល ប្រជុំនៅវ៉ារសូវី លោក Portr Blazeusz អគ្គមេបញ្ជាកងទ័ពពហុជាតិ Eurocorps បាន លើកឡើងថា ការសម្លុត របស់រុស្ស៊ីលើមេឃរបស់អឺរ៉ុប បានតម្រូវ ឲ្យប្រទេសអឺរ៉ុបត្រូវតែបើកភ្នែក ឃើញការគំរាម ដ៏ជិតបង្កើត។ លោកអះអាងថា ដ្រូនទាំងនោះគឺវាបញ្ជាក់ថា ការគំរាម វាចេញមកពី រុស្ស៊ី។ ពីមុនគេធ្លាប់គិត ថា មីស៊ីល រុស្ស៊ីនឹងមិនអាចហោះទៅដល់ទីក្រុងអឺរ៉ុបនៅឆ្ងាយ ៗដូចជាប៉ារីសបានទេ។ តែថ្ងៃនេះ គ្រប់គ្នាឃើញច្បាស់ហើយ ថាមិនថាដ្រូន មិនថាមីស៊ីល គឺអាចហោះទៅដល់យ៉ាងងាយ បំផុត ។ ដូច្នេះ គ្រប់គ្នាសុទ្ធតែ អាចរងគ្រោះ !

គួរកត់សំគាល់ថា ការសហការជាមួយ អ៊ុយក្រែន នៅក្នុង វិស័យ ការពារ ផ្លូវអាកាស គឺជា ចំណុចស្នូលមួយ នៅក្នុងការប្រជុំវេទិកាសន្តិសុខប្រចាំឆ្នាំ រវាងក្រុមប្រទេសអឺរ៉ុប នៅប៉ូឡូញកាលពីថ្ងៃចន្ទ ២៩កញ្ញា ។ លោករដ្ឋមន្ត្រីការពារជាតិ អាល្លឺម៉ង់ Boris Pistorius បាន គូសបញ្ជាក់ថា ឧស្សាហកម្ម ផលិតសព្វាវុធ របស់អឺរ៉ុបនិងអ៊ុយក្រែនត្រូវតែ រួមដៃគ្នា សហការយ៉ាងស្អិត និង ឲ្យ មានប្រសិទ្ធភាពបំផុត ។ លោក បន្ថែមថា សហភាពអឺរ៉ុបត្រូវតែ ចូលរួម គាំទ្រ ដំណើរការនេះ តាមរយៈការផ្តល់មធ្យោបាយ និង ក្របខណ្ឌ ច្បាប់ឲ្យ កាន់តែ ល្អធូរស្រាល សម្រាប់ឧស្សាហកម្ម សព្វាវុធអឺរ៉ុប ។ តែទោះជាយ៉ាងណា លោក រដ្ឋមន្ត្រី ការពារជាតិអាល្លឺម៉ង់ បាន លើកឡើងថា ផែនការ យុទ្ធសាស្ត្រថ្មីនេះ នឹងត្រូវការពេលវេលាយូរដើម្បី រៀបចំស្ថាបនា មិន មែន ៣ឬ៤ឆ្នាំធ្វើបានរួចរាល់នោះទេ ។

Nº.1035