លោក ដូណាល់ ត្រាំ ប្រកាសជួយអ៊ុយក្រែនវាយដណ្តើមយកទឹកដីវិញ
ចេញផ្សាយនៅថ្ងៃទី២៥ ខែកញ្ញា ឆ្នាំ២០២៥
ប្រធានាធិបតីអាមេរិក លោក ដូណាល់ ត្រាំ បានផ្លាស់ប្តូរជំហរក្នុងសំណុំរឿងសង្គ្រាមអ៊ុយក្រែន ។ ពីមុន លោកត្រាំធ្លាប់ស្តីបន្ទោសមេដឹកនាំអ៊ុយក្រែនថារឹងទទឹងមិនព្រមទទួលយកលក្ខខណ្ឌរុស្ស៊ីនិងមិនចង់បញ្ចប់សង្គ្រាម តែពេលនេះ លោកថា នឹងជួយអ៊ុយក្រែនដើម្បីដណ្តើមយកទឹកដីមកវិញ។ ការថ្លែងដូច្នេះ ធ្វើឡើងនៅមហាសន្និបាតអង្គការសហប្រជាជាតិ ជាទីដែលចៅហ្វាយសេតវិមានបញ្ចេញយោបល់ក្នុងសំណុំរឿងអន្តរជាតិជាច្រើនផ្សេងទៀត។
នៅវេទិកាមហាសន្និបាតអង្គការសហប្រជាជាតិ ថ្ងៃទី២៣កញ្ញា ប្រធានាធិបតីអាមេរិក លោក ដូណាល់ ត្រាំ បាននិយាយអួតសរសើរពីវិធានការសេដ្ឋកិច្ច និងនយោបាយទប់ស្កាត់ជនអន្តោប្រវេសន៍ ដែលលោកថា មានប្រសិទ្ធភាពនិងនាំមកនូវចំណូលសន្ធឹកសន្ធាប់ឲ្យអាមេរិក។ ក៏ប៉ុន្តែ ចំណាត់ការរបស់មហាអំណាចទី១នេះ ហាក់សុទ្ធតែបញ្ច្រាសពី ពហុនិយមនិងមនុស្សធម៌ ដែលជាគោលការណ៍របស់សហប្រជាជាតិ។
ក្នុងជំនួបកំពូលសហប្រជាជាតិ និងនៅចំពោះមុខមេដឹកនាំប្រទេស១៩៣ លោកចៅហ្វាយសេតវិមានបានលើកឡើងសំណុំរឿងអន្តរជាតិជាច្រើន។ ជុំវិញសង្គ្រាមអ៊ុយក្រែន លោក ដូណាល់ ត្រាំ បានបរិហារប្រទេសអឺរ៉ុប ដោយថាផ្តល់ហិរញ្ញវត្ថុបំប៉នភ្លើងសង្គ្រាមដើម្បីប្រឆាំងនឹងខ្លួនឯង។ ដ្បិតថា ពួកគេទាមទារបញ្ចប់សង្គ្រាមរុស្ស៊ីឈ្លានពានអ៊ុយក្រែន តែទន្ទឹមនឹងគ្នានេះ ពួកគេបន្តទិញប្រេងនិងឧស្ម័នរុស្ស៊ី។ ដោយក្រឡាស់ជំហរ ពីស្និទ្ធនឹងរុស្ស៊ី មកដកឃ្លាបន្តិចពីពូទីន លោក ត្រាំ ថា កងទ័ពអ៊ុយក្រែនមានកម្លាំងទប់ទល់នៅសមរភូមិមុខ ហើយអាមេរិកនឹងជួយអ៊ុយក្រែនដើម្បីដណ្តើមយកទឹកដីមកវិញ និងថា ទ័ពអ៊ុយក្រែនអាចវាយចូលដីរុស្ស៊ីវិញផង។ លោក ត្រាំ ក៏ចំអកដែរថា រុស្ស៊ីរបស់លោក ពូទីន គ្រាន់តែជាខ្លាក្រដាស ហើយកំពុងតែមានវិបត្តិសេដ្ឋកិច្ច។ នៅថ្ងៃពុធ ទី២៤កញ្ញា អ្នកនាំពាក្យវិមានក្រេមឡាំង លោក ឌីមីទ្រី បេស្កូវ បានប្រតិកម្ម ដោយឌឺដងបែបលេងសើចផងថា រុស្ស៊ីមិនមែនជាខ្លាក្រដាសទេ តែជាខ្លាឃ្មុំ ព្រោះគេមិនដែលនិយាយថាមានខ្លាឃ្មុំក្រដាសឡើយ។ លើសពីនេះទៀត អ្នកនាំពាក្យវិមានក្រេមឡាំង អះអាងថា កងទ័ពរុស្ស៊ីកំពុងរុលទៅមុខជានិច្ច នៅគ្រប់សមរភូមិ ហើយសេដ្ឋកិច្ចរុស្ស៊ីក៏មានស្ថិរភាពល្អណាស់។
Nº.1020
