តើជប៉ុនអាចមាននាយករដ្ឋមន្ត្រីស្រីជាលើកដំបូងឬទេ?
ចេញផ្សាយនៅថ្ងៃទី១៩ ខែកញ្ញា ឆ្នាំ២០២៥៖
ថ្ងៃព្រហស្បតិ៍ ទី១៨កញ្ញា អ្នកនយោបាយជាតិនិយមជប៉ុន លោកស្រី តាកាអ៊ីជី សាណាអេ បានប្រកាសឈរឈ្មោះជានាយករដ្ឋមន្ត្រីថ្មី។ ក្នុងប្រវត្តិសាស្ត្រជប៉ុន ពុំធ្លាប់មានអ្នកនយោបាយស្រីណាម្នាក់ ឈានទៅអង្គុយកៅអីនាយករដ្ឋមន្ត្រីសោះឡើយ ។ តើលោកស្រី តាកាអ៊ីជី សាណាអេ អាចនឹងមានឱកាសក្លាយជា នាយករដ្ឋមន្ត្រីស្រី ជាលើកដំបូងនៅជប៉ុន ឬទេ?
ក្នុងប្រវត្តិសាស្ត្រជប៉ុន គ្មានអ្នកនយោបាយស្រីណាម្នាក់ធ្លាប់ធ្វើជានាយករដ្ឋមន្ត្រីសោះ។ ពេលនេះ លោកស្រី តាកាអ៊ីជី សាណាអេ (Sanae Takaichi) ដែលជាអ្នកនយោបាយអភិរក្សនិយម និងជាតិនិយមជប៉ុន ចង់សាកល្បងប្រកួតប្រជែងយកតំណែងនាយករដ្ឋមន្ត្រីជប៉ុន។ ការប្រកួតនេះបានធ្វើឡើងតាមរយៈការប្រកាសបេក្ខភាពឈរឈ្មោះជា ប្រមុខដឹកនាំបក្សកាន់អំណាច គឺគណបក្សសេរីនិយមប្រជាធិបតេយ្យ។ នៅជប៉ុន ទាល់តែមានតួនាទីជាប្រធានបក្សកាន់អំណាច ទើបអាចទទួលការបោះឆ្នោតផ្តល់សេចក្តីទុកចិត្តពីសភា ឲ្យឡើងអង្គុយកៅអីនាយករដ្ឋមន្ត្រី។
មានវ័យ ៦៤ឆ្នាំ លោកស្រី តាកាអ៊ីជី សាណាអេ ជាអ្នកតំណាងរាស្ត្រ និងជាមនុស្សជំនិតរបស់អតីតនាយករដ្ឋមន្ត្រីជប៉ុន លោក Abe Shinzo (អាបេ ស៊ីនហ្ស៊ូ)។ កម្មវិធីនយោបាយសេដ្ឋកិច្ចរបស់លោកស្រី គឺប្រឆាំងនឹងការដំឡើងអត្រាការប្រាក់ខ្ពស់ និងចង់ជំរុញការចាយវាយរបស់ប្រជាជនដើម្បីជួយសន្ទុះសេដ្ឋកិច្ច។ ក្នុងថ្ងៃប្រកាសបេក្ខភាពឈរឈ្មោះដើម្បីធ្វើជាប្រមុខបក្សកាន់អំណាច លោកស្រីបានលើកឡើងថា «ជប៉ុនសព្វថ្ងៃ ត្រូវការនយោបាយកែទម្រង់ ផ្លាស់ប្តូរជីវភាពប្រចាំថ្ងៃ និងផ្លាស់ប្តូរក្តីព្រួយបារម្ភរបស់ប្រជានុរាស្ត្រ ឲ្យឈានឆ្ពោះទៅរកអនាគតថ្មីមួយ ពោរពេញដោយក្តីសង្ឃឹម»។
រីឯនយោបាយការបរទេសវិញ លោកស្រី តាកាអ៊ីជី សាណាអេ មានជំហរប្រឆាំងមហាយក្សចិន និងតែងតែរិះគន់មិនសំចៃមាត់ចំពោះការលេចត្រដែតឡើងនៃឥទ្ធិពលកងទ័ពចិន នៅតំបន់អាស៊ី និងនៅអូសេអានី។ លោកស្រីក៏ឧស្សាហ៍អញ្ជើញទៅវិហារ យ៉ាសូគុនី (Yasukuni) ដើម្បីគោរពវិញ្ញាណក្ខន្ធយោធាជប៉ុន ស្លាប់ក្នុងសង្គ្រាមលោកលើកទី២ ដែលបង្កការខឹងសម្បារនិងរិះគន់ពីសំណាក់ប្រទេសរងគ្រោះផ្សេងទៀត ដូចជា ចិន និងកូរ៉េខាងត្បូង។
អ្នកនយោបាយស្រីរូបនេះ ត្រូវប្រឈមមុខប្រកួតប្រជែងនឹងឥស្សរជន អ្នកនយោបាយប្រុសៗ ចំនួន ៤ នាក់ ដែលបានប្រកាសបេក្ខភាពដណ្តើមយកតំណែងប្រមុខរដ្ឋាភិបាល ដែរ។ ពោលគឺមាន លោក ខូយហ្ស៊ឺមី ស្ហ៊ីណជីរ៉ូ (Shinjiro Koizumi) រដ្ឋមន្ត្រីក្រសួងកសិកម្ម រុក្ខ និងនេសាទ, លោក Yoshimasa Hayashi អគ្គលេខាគណបក្សកាន់អំណាច និងជាអតីតរដ្ឋមន្ត្រីអប់រំ, លោក Toshimitsu Motegi អតីតរដ្ឋមន្ត្រីក្រសួងការបរទេស និង លោក Takayuki Kobayashi រដ្ឋមន្ត្រីក្រសួងសេដ្ឋកិច្ច។
ការស្ទង់មតិចុងក្រោយបំផុត ចុះផ្សាយនៅថ្ងៃព្រហស្បតិ៍ ទី១៨កញ្ញា បានបង្ហាញឲ្យឃើញថា លោកស្រី តាកាអ៊ីជី សាណាអេ ឋិតក្នុងលំដាប់ទី២។ អ្នកឈាននាំមុខគេ គឺ រដ្ឋមន្ត្រីកសិកម្ម លោក ខូយហ្ស៊ឺមី ស្ហ៊ីណជីរ៉ូ ដែលកំពុងតែមានប្រជាប្រិយភាពខ្លាំង និងមានទំនាក់ទំនងល្អជាមួយគណបក្សប្រឆាំង។ មានវ័យ៤៤ឆ្នាំ លោកជាកូនប្រុសរបស់លោក ខូយហ្ស៊ឺមី (Junichiro Koizumi)អតីតនាយករដ្ឋមន្រ្តី។ តែយ៉ាងក៏ដោយ ការបោះឆ្នោតជ្រើសតាំងមេដឹកនាំជប៉ុនថ្មី នឹងសម្រេចជាចុងក្រោយ នៅថ្ងៃទី ៤ តុលា ខាងមុខ៕
Nº.1018
