អ៊ីស្រាអែលបាញ់ប្លោងគ្រាប់ដល់រដ្ឋធានីដូហារបស់កាតា
ចេញផ្សាយនៅថ្ងៃទី១០ ខែកញ្ញា ឆ្នាំ២០២៥
កាលពីរសៀលថ្ងៃអង្គារទី៩កញ្ញា សំឡេងផ្ទុះបានលាន់ឮ នៅទីក្រុងដូហារបស់កាតា។ អាជ្ញារធរកាតា បានអះអាងថា គឺកងទ័ពអ៊ីស្រាអែល បានបើកការវាយប្រហារ បាញ់ប្លោងគ្រាប់ សំដៅចង់សម្លាប់មេក្រុមហាម៉ាស ដែលស្នាក់នៅទីក្រុងដូហា។ កាតាបានបរិហារ ចាត់ទុកការវាយប្រហារនេះ ថាជាអំពើដ៏កំសាកនិងថោកទាបបំផុតរបស់អ៊ីស្រាអែល។
សំឡេងគ្រាប់ផ្ទុះបានលាន់ឮ នៅទីក្រុងដូហា កាលពីរសៀលថ្ងៃអង្គារទី៩កញ្ញា។ រូបភាពវីដេអូ បានបង្ហាញឲ្យឃើញផ្សែងខ្មៅឆាបឆេះឡើងទៅលើ នៅទីក្រុងរបស់កាតា។ ភ្លាមៗក្រោយដំណឹងនេះ កងទ័ពអ៊ីស្រាអែល បានចេញលិខិតប្រកាស បញ្ជាក់ថាកងទ័ពនិងបណ្តាញចារកិច្ចក្រៅប្រទេសរបស់អ៊ីស្រាអែល បានបើកប្រតិបត្តិការ វាយប្រហារដោយចំពោះ សំដៅសម្លាប់មេក្លោងធំៗរបស់ក្រុមភេរវកម្មហាម៉ាស។ តែលិខិតនេះ មិនបានបញ្ជាក់ទេ ថាអ៊ីស្រាអែលបានបើកការវាយប្រហារនៅទីកន្លែងណា។
ដោយឡែក អាជ្ញាធរកាតាបានចេញមកប្រកាសភ្លាមៗ ថាពិតជាមានការវាយប្រហារបាញ់ប្លោងគ្រាប់ពីសំណាក់អ៊ីស្រាអែល មកលើរដ្ឋធានីកាតា សំដៅសម្លាប់មេធំៗរបស់ក្រុមហាម៉ាសដែលស្នាក់នៅទីក្រុងកាតា។ រដ្ឋាភិបាលកាតា បានប្រកាសថ្កោលទោស ចាត់ទុកការវាយប្រហាររបស់អ៊ីស្រាអែល ថាជាអំពើដ៏កំសាកនិងថោកទាបបំផុត។
តែគិតត្រឹមល្ងាចថ្ងៃអង្គារទី៩កញ្ញា ភ្លាមៗក្រោយការវាយប្រហារ គេមិនទាន់មានដំណឹងបញ្ជាក់ថា មានអ្នករងគ្រោះស្លាប់ឬរបួសប៉ុន្មាននាក់នោះទេ។
ប្រតិកម្មទៅនឹងការវាយប្រហាររបស់អ៊ីស្រាអែល ដល់ទីក្រុងដូហានេះ ទាំងក្រុមហាម៉ាស ក្រុមជីហាតអ៊ីស្លាមីក អ៊ីរ៉ង់ និងអារ៉ាប៊ីសាអូឌីត បានចេញមកប្រកាសថ្កោលទោសដូចៗគ្នា ដោយចាត់ទុកថា អ៊ីស្រាអែលបានបំពានយ៉ាងស្រស់ៗ ទៅលើច្បាប់អន្តរជាតិ និងទៅលើអធិបតេយ្យភាពរបស់កាតា។ ដូចគ្នាដែរ លោក អង់តូនីញ៉ូ ហ្គូទែរស៍ អគ្គលេខាធិការអង្គការសហប្រជាជាតិ បានថ្កោលទោសថាអ៊ីស្រាអែល បានបំពានអធិបតេយ្យភាពរបស់កាតា។ រីឯស្ថានទូតសហរដ្ឋអាមេរិកប្រចាំនៅកាតា បានជូនដំណឹងប្រាប់ទៅប្រជាពលរដ្ឋខ្លួនរស់នៅដូហា ឲ្យសំងំនៅកន្លែងមានសុវត្ថិភាព។
ដោយឡែក លោកនាយករដ្ឋមន្ត្រីអ៊ីស្រាអែល នេតាន់យ៉ាហ៊ូ បានបញ្ជាក់ថា ការវាយប្រហារដែលកងទ័ពអ៊ីស្រាអែលបានធ្វើនៅទីក្រុងដូហាប្រទេសកាតា គឺជាប្រតិបត្តិការឯករាជ្យ ដែលអ៊ីស្រាអែលសម្រេចធ្វើតែម្នាក់ឯង និងសូមទទួលខុសត្រូវទាំងស្រុងតែម្នាក់ឯង ដោយគ្មានពាក់ព័ន្ធជាមួយប្រទេសណាទាំងអស់។ លោកនេតាន់យ៉ាហ៊ូអះអាងថា គឺមេក្រុមភេរវកម្មហាម៉ាស ដែលពួនសំងំនៅក្រុងដូហានេះហើយ ដែលជាមេក្លោង សម្រេចចេញបញ្ជានានា ទៅកាន់សមាជិកក្រុមហាម៉ាស ឲ្យវាយប្រហារមកលើអ៊ីស្រាអែល និងបន្តធ្វើសង្គ្រាមនៅហ្កាហ្សា៕
Nº.0997
